Mikið er maður kominn með upp í kok

Af þessu Saving Iceland dæmi.

Við Íslendingar erum fullfærir um að bjarga sjálfir því sem við viljum bjarga. Við erum ekki smákrakkar sem þurfum að fá athyglissjúka öfgamenn utan úr löndum til að segja okkur hvernig á að haga hlutum hér.

Sérstaklega í ljósi þess að þeir hafa augljóslega engan áhuga á að ræða málin, eins og sjá má af atferli þeirra gagnvart Friðrik Sophussyni í morgun.

Ef við ákveðum að við viljum ekki fleiri virkjanir, eða viljum ekki meiri iðnað, þá einfaldlega kjósum við flokk sem lofar slíku í kosningum.

 Það væri aum ríkisstjórn sem beygði sig undir erlenda áhrifahópa og breytti stefnu sem henni er treyst fyrir í kosningum útaf einhverri frekju og apakattalátum.

Mótmæla við Landsvirkjun

Til Hamingju Ásdís

Ofboðslega gaman að sjá besta spjótkastara landsins kominn aftur í gírinn.

 

Það verður áhugavert að sjá hvernig henni gengur á Ólympíuleikunum. Ég efast ekki um að hún á eftir að standa sig eins og hetja.

Íslandsmet og Ólympíulágmark hjá Ásdísi

Ekki eru það bara Múslimar sem eru hörundssárir.

Ég verð að viðurkenna að þetta kemur soldið flatt upp á mig.

Hélt alltaf að Vesturlandabúar almennt, og Íslendingar sérstaklega kynnu að taka gríni. Við erum einmitt nýbúin að sitja undir umræðu um hvað það sé skrítið hvað múslimar hoppuðu upp á nef sér út af nokkrum myndum af spámanninum. Við hér erum svo vön því að mega segja hvað sem við viljum, þartil það fer að kallast rógburður. Sumir verða kannski móðgaðir, eða finnst sér ofboðið, en almennt vita menn samt að um saklaust grín er að ræða í svona tilfellum.

Hvernig er það annars, á fólki ekki að finnast að það megi gera grín að rannsóknarréttinum? Ætla íslenskir Kaþólikkar virkilega að taka þann pól að þeir ætli að taka til sín gagnrýni á gamla rannsóknarréttinn?

 Í þeirra sporum myndi ég sko setja sem mesta fjarlægð milli þess sem Kaþólska kirkjan er í dag, og þess sem hún gerði á miðöldum. Þeir ættu að fordæma þessa atburði, taka þátt í því að grínast með það hvað þessir menn voru lokaðir, hatursfullir og heimskir.

 Ekki verja þá og taka til sín gagnrýni á þá.

Segja upp viðskiptum við Símann

"Looks like the Bear Patrol is working like a charm"

Mér finnst þetta minna alveg ískyggilega mikið á gamlan Simpson þátt, þarsem björn ráfar inn í bæinn.

 Allir bæjarbúar fara í mikið uppnám, og þrátt fyrir að það sé eini björninn sem sést hefur í bænum í áratugi er sett í gang milljóna-prógram til að hindra fleiri birni í að gera sig heimakomna (Bear Patrol í Simpson var m.a. með stealth-þotur í könnunarflugi).

Auðvitað var þetta ýkt í þessum þætti. En inntakið var hvað það væri mikill molbúaháttur að stökkva upp á nef sér og verða paranoid gagnvart einhverju, sem gerist ótrúlega sjaldan, bara vegna þess að einu sinni eða tvisvar verður vart við eitthvað sem er þannig séð mjög ólíklegt.

Ísbjarna leitað úr lofti

Algjörlega óþolandi.

Ég skil það alveg að bílstjórar geti verið ósáttir, en þá geta þeir bara farið í mótmælagöngu niður að Alþingishúsinu, eða farið í verkfall, eða eitthvað annað. Þeir hafa engann rétt á að lama allar samgöngur sem þeim dettur í hug til að berjast fyrir sínum sérhagsmunum.

 Þetta er eins og ósáttir bankastarfsmenn færu að loka reikningum viðskiptavina til að mótmæla stefnu stjórnvalda, eða ef starfsmenn í matvöruverslunum settu bara útrunnar vörur í hillurnar í mótmælaskyni.

 

Það er eitt að tjá óánægju sína, annað að fara og gera fólki sem hefur ekkert gert á manns hlut lífið leitt.

Ég í raun skil ekki hvernig Íslendingar geta látið svona óstjórnlega frekju og eigingirni yfir sig ganga.

Handalögmál í Ártúnsbrekku

Leitt að heyra

Gary Gygax hafði í raun mikil áhrif á hinn vestræna heim, þó þau væru afmörkuð. Sjálfur hef ég spilað ófáa klukkutíma af d&d gegnum tíðina. Það er ekki fyrir alla endilega, en með góðra vina hóp getur þetta verið mjög skemmtilegt.

 Ég tek undir það sem annar bloggari sagði og mæli með 1d6 mínútna þögn.

Skapari D&D látinn

Stórt svarthol?

Mér skildist svona einhvern veginn að mergurinn málsins með svartholum væri að þau væru svona kvikindi þarsem allur massinn hefur fallið saman í einn punkt...svo að tæknilega séð væru öll svarthol 'jafn stór'. En svo getur verið að þeir eigi við að það sé 18-milljarða sinnum meiri massi í þessum tiltekna punkti heldur en í sólinni...eða að það sé svo mikil massi í þessum punkti að  'event horizon' svartholsins sé 18 milljarða sinnum umfangsmeiri en sólin.

 

En svo getur líka verið að þetta sé bara einhver skilmysingur hjá mér.

Gríðarstórt svarthol fundið

Slökkvilið og aðrir viðbragðsaðillar eiga hrós skilið.

Þetta er búinn að vera einn af meira pirrandi dögum sem ég man eftir, en jafnframt einn af þeim sem minnir mig á hvað við höfum það gott að eiga svona góðar og skilvirkar sveitir sem koma til hjálpar.

 

Dagurinn minn byrjaði klukkan 2, eins og vill vera í jólafríum, þegar bróðir meðleigjanda míns, sem gisti hérna vakti mig með þeim fréttum að 'það væri eitthvað að íbúðinni minni'.

 

Þá var komið 1-2cm lag af vatni yfir alla íbúðina, eins og hún leggur sig. Og þó erum við ekki á jarðhæð. Kemur í ljós að svalirnar eru alveg gegnheil skál úr steypu, með bara einu niðurfalli. Þegar það stíflaðist safnaðist vatnið bara saman þartil það fór að flæða meðfram og í gegnum svalahurðina (sem þó var tryggilega lokuð). Þetta hélt svo áfram í 7-8 tíma, þartil allt var orðið fullt.

 

Við vorum reyndar alveg ljónheppnir að ekkert af rafmagnsvörum skemmdust í þessu, utan eitt fjöltengi, sem tókst einhvern vegin að bráðna i hálfgert mauk. Og svo skemmdist eitthvað af bókum.

 

En fyrstu viðbrögð, eftir að bjarga raftækjum, voru að hringja í slökkviliðið, og eftir ekki svo langa stund (það var jú mjög mikið að gera) komu þeir með dælu og sköfur (það er ekkert niðurfall í íbúðinni, komumst við að) og eftir svona klukkutíma moð, var mesta vatnið farið. Það sem er eftir er mestmegnis skúringavinna.

 

Okkur reiknast til að það hafi verið rúmir 800 lítrar inni í íbúðinni þegar mest var, alveg ótrúlegt.

 

Að lokum langar mig að þakka slökkiliðinu fyrir skjót og góð viðbrögð, og tilnefna arkitektinn bakvið Neshaga 5, 7 og 9 til einhvers konar aula-verðlauna.

Yfir 220 útköllum sinnt í dag

Ég þekki engan útlending sem hefur dáðst að þessum húsum.

Yfirleitt þá líkar þeim við Reykjavík 'þrátt fyrir' húsakostinn í miðborginni.

 Og hverjum datt í hug að það ætti að varðveita hús, eingöngu af því þau eru gömul? Allt er hluti af sögunni, þú getur ekki mögulega varðveitt allt sem er hluti af sögunni og neitað að leyfa því að breytast. Mikið af gömlu húsunum í Reykjavík ber helst merki um sögu í lélegri kunnáttu og lélegum efniviði. Eins og skemmur sem fólk ákvað að búa í. Auðvitað eru mörg falleg hús líka, og hús sem raunverulega höfu áhrif á framvindu íslandssögunnar. Og eftir atvikum má varðveita þau, annaðhvort þarsem þau eru, ef það er praktískt, eða í árbæjarsafni eða á viðlíka stað.

Mér finnst það bara alveg fáránleg afturhaldssemi að vilja varðveita heilar götur eða jafnvel byggðarkjarna 'í núverandi mynd' helst um alla eilífð.

Er það eitthvert grín? Hver vill, raunverulega, laugaveg fullan af 18. aldar skemmum langt inn í 21. öldina? Þau eru gömul, úr sér farin, og í ógnarmörgum tilfellum ljót (amk að mínu mati).

Besta leiðin til að bjarga miðbænum er að varðveita einungis þá hluta af honum sem eru þess virði, og sóma sér vel í nútíma borg, en endurbyggja restina, þétta byggð, gera fallegri og rúmbetri húsnæði, bæði til íbúðar og verslanna eða fyrirtækjareksturs.

 Það er svo annað, hafið þið prófað að ganga um í gömlu húsi, maður rekst alls staðar uppundir loftið, og stutt á milli veggja.

Tækninni hefur fleygt fram síðan miðborg Reykjavíkur var byggð og við erum margfalt ríkari en við vorum þá. Af hverju í dauðanum ættum við að rembast við að halda áfram að búa í, eða hafa í kringum okkur kofa sem forfeður okkar reistu af litlum efnum, og úr litlum efnum?

Rætt um niðurrif í miðborginni

Þetta er visst vandamál, en líka tækifæri.

Hátt matvælaverð er slæmt, fyrir matvælakaupendur. En það er líka gott fyrir matvælaframleiðendur.

Nú hefur sú regla verið næstum gefin í hagfræði að matvælaverð fari sífellt lækkandi. Það verður sífellt ódýrara að framleiða mat, þarf færra fólk, þarsem betri tæki koma í staðinn, en fólk heldur samt áfram að borða bara svipað mikið, svo eftirspurn eykst ekki með lækkaða verðinu, nema að frekar litlu leyti.

Nú er samt eftirspurnin að breytast mjög, bæði vegna þess að fyrrum fátæk asíulönd, svosem Kína, eru að verða ríkari, og fólkið þar er farið að gera kröfu um meiri og betri mat, í alveg þónokkrum mæli (og er það fagnaðarefni).

Og svo eru það etanól-bílarnir. Helsti gallinn við það er hvað etanólið er niðurgreitt. Það veldur því að bændur græða á að skipta yfir í korn, og breyti í etanól. Þósvo t.d. etanól framleitt úr sykurreyr, eins og þeir framleiða það í Brazilíu, sé bæði praktískara og mengi minna.

Hér kemur svo ástæðan fyrir því að þetta er ekki bara vandamál, heldur líka gullið tækifæri, ef rétt er úr spilað. Í fyrsta lagi fara um 70% af útgjöldum evrópusambandsins í að verna landbúnaðinn í þeim löndum á einn eða annan hátt. Þeir eru með styrki og niðurgreiðslur til bænda, og háa verndartolla.

Hækkað matarverð þýðir að sjálfsögðu að það er hægt að lækka þessa vernd, án þess að það komi illa niður á landbúnaðnum. Hann er jú að fá meira fyrir framleiðsluna sína ef verðið hækkar.

 Hitt er að landbúnaður er helsti atvinnuvegurinn í mörgum þróunarlöndum. Svo þessi þróun hjálpar þeim á besta mögulega háttinn.

 Það sem vestræn ríki ættu að gera er að lækka verndartolla sína, og leyfa ódýrari matvöru frá afríku að lækka matarverð, þeir græða á að selja okkur það, og við græðum á að kaupa það ódýrara af þeim en það myndi kosta að framleiða það hjá okkur. (sem er einmitt grunnurinn í alþjóðahagfræði, sá á að stunda framleiðsluna sem ber minnstan fórnarkostnað af að gera það).

Einnig ættum við ekki að niðurgreiða etanól, það skekkir myndina og leyfir frekar ópraktísku eldsneyti að ryðja sér til rúms, meira en það hefur burði til, á kostnað skattborgara, og matarkaupenda.

Að lokum þarf að endurskoða hvernig fátækt fólki í borgum, sérstaklega í þróunarríkjum, sem er hópurinn sem að öllu jöfnu kemur verst út úr þessu (þau eru fátæk, búa í þróunarlandi, og eru ekki að græða beint á aukna matarverðinu þarsem þau eru ekki bændur) er hjálpað. Besta leiðin er að mínu mati að lækka álögur á matvæli, hækka skattleysismörk og mögulega skoða einhverjar aðrar leiðir til að forða hungursneyð. (það er nóg af fólki sem vill framleiða matinn, og nóg af fólki sem vill kaupa hann, þetta er bara spurning um tæknileg atriði, ef viljinn er fyrir hendi)

Ég er bjartsýnn, þetta gæti verið vogarstöngin sem þarf til að breyta fáránlegri landbúnaðarstefnu evrópusambandsins, lækka verndartolla á mat, og gera Afríku kleyft að grafa sig upp úr vesældinni að miklu leyti af eigin rammleik.

 En það veltur náttúrlega allt á því að stjórnmálamenn séu framsýnir og klókir.

Matvælaverð aldrei hærra