Ekkert væl Hörður.

Þetta er næstum nákvæmlega það sem ég vildi.

 

Eina sem gæti verið betra er ef Ríkisstjórnin segði af sér og við tæki utanþingsstjórn, þá væri þetta nákvæmlega það sem ég vil.....tja, og það að Geir væri ekki með krabbamein, það er auðvitað ferlegur sjúkdómur sem enginn ætti að hafa og ég óska honum alls góðs í baráttunni við það.

 

En mér liggur ekki svona mikið á kosningum. Ég vil gefa nýjum framboðum tíma til að myndast, ef við þvingum kosningar strax verður það bara niðurstaðan að VG mynda stjórn, annaðhvort með Framsókn eða leyfunum af Samfylkingu....eða þá bara einir.

 

Ég vil ekki kjósa neinn af flokkunum sem eru til staðar núna. Maí er rétt tæplega nógur tími til að mynda nýtt alvöru framboð, en fyrst við fáum ekki bráðabirgðastjórn á meðan er ágætt að draga þetta ekki of lengi heldur.

Og auðvitað ætti einhver að segja af sér, það er augljóst....en fyrst þeir gera það ekki, þá látum við þá bara finna fyrir því í kosningunum.

Höldum áfram útifundi og minnum á það fram að kosningum hverjir eigi ekki skilið atkvæði.

Hænuskref í rétta átt

Þetta gengur nú út yfir allan þjófabálk.

"Við erum að sprengja ykkur, en trúið mér, það er ykkur fyrir bestu"

Eru menn búnir að gleyma því að þarna býr saklaust fólk?

Eru menn búnir að gleyma því að þarna er lýðræðislega kjörin stjórn?

Eru menn almennt búnir að gleyma því að Palestínumenn eru manneskjur?

Livni: Hernaður þjónar hagsmunum beggja

Sumir vita ekki hvað orðið 'andhetja' þýðir.

Andhetja er ekki bófi, illmenni eða morðingi, heldur hetja sem uppfyllir ekki staðalmynd hetjunnar. Í íslenskum bókmenntum er þetta kallað dökk hetja.

Skarphéðinn Njálsson úr Njálu var andhetja, Batman er andhetja.

 

William Zantzinger var hinsvegar bara morðingi og hrotti og einskis konar hetja.

Andhetja Dylans látin

Berja Tæknifólk?

Er þetta eitthvað lélegt grín? Er það svona sem við ætlum að vera sem þjóðfélag?

 

Ég er eiginlega orðlaus, mér finnst þetta svo fáránlegt.

 

Blogga kannski meira um þetta síðar. En ég er sammála Sigmundi Erni, þetta er náttúrulega langt út fyrir öll mörk.

Fólk slasað eftir mótmæli

Djöfull er þessi Guð hörundssár.

Fyndið að sumir þykjast ekki bara vita að Guð sé til, heldur telja þeir líka að þeir þekki skoðanir hans og tilfinningar, og telja sig þurfa að stökkva í vörn fyrir hann við minnsta tilefni.

 

Maður myndi ætla að almáttugur Guð gæti a) barist sína bardaga sjálfur og b) mögulega verið hafinn yfir mannlega breyskleika eins og að vera hörundssár og móðgunargjarn.

 

Ég þurfti bara að vera pirraður yfir þessu fólki aðeins, hef í raun ekkert merkilegt að segja.

Madonna sökuð um að móðga guð

Vonum hið besta.

Mikið vona ég að þessir fáu og æstu skemmi ekki fyrir hinum.

Ég skil gremju þeirra svosem vel, og mér finnst Davíð þurfa að víkja. En þetta má ekki vera eina leiðin til að koma þeim skilaboðum áfram.

 

Þetta setur stjórnvöld í þá stöðu að þurfa annaðhvort að sitja sem fastast við sinn keip, jafnvel þósvo það sé augljóst að sumt þurfi að breytast, eða að láta undan, og gefa þarmeð þau skilaboð að ef 50-100 manns eru nógu frekir og ganga nógu langt, þá fái þeir það sem þeir vilja. Að þetta sé leiðin til að knýja fram breytingar.

Ég trúi ekki öðru en að öllum sé ljóst að það þarf mannaskiptingar, bæði í Seðlabanka og Ríkisstjórn. Ég held að meira að segja ríkisstjórninni sé þetta ljóst....þó þeir geti ekki rætt það. Það er eina leiðin til að endurbyggja einhverskonar traust, bæði milli almennings og stjórnvalda, og milli Íslands og umheimsins. Það eina sem menn greinir á um er nákvæmlega hvenær og með hvaða hætti slíkt getur átt sér stað.

Því minna sem ríkisstjórnarflokkarnir koma til móts við sanngjarnar kröfur almennings, því meira munu þeir fá að finna fyrir því þegar að kosningum kemur.

 

En við eigum ekki að brjótast til inngöngu í stofnanir og reyna að þrýsta vilja okkar áfram með valdi...að minnsta kosti ekki fyrr en algjörlega er útséð um það að breytingar fáist alls ekki öðruvísi.

 

Stundum þarf almenningur að rísa upp gegn ríkisvaldinu og steypa því af stóli með öllum tiltækum ráðum. Sá tími er þó langtífrá runninn upp á Íslandi. Þess gerist ekki enn þörf að við þurfum að yfirgefa grundvallar skipulag okkar lýðræðis og beita hnefavaldinu. Og ég trúi ekki að við Íslendingar séum þessháttar þjóð að þess eigi að þurfa.

Reynt að fá fólk út með góðu

Fáránlegt en satt...

En þósvo Vigdís hafi ekki verið forseti síðustu 12 árin, þá er hún enn mun meira sameiningartákn þjóðarinnar en Ólafur verður nokkurn tíma. Mér finnst hún hegða sér meira eins og forseti og vera betri fulltrúi okkar í alla staði.

  Á svona stundum þurfum við þess háttar fólki að halda sem allir Íslendingar geta borið virðingu fyrir og sem geta sýnt þá ímynd út á við sem við teljum að endurspegli okkur.

Forsetaembættið er vissulega ekki valdamikið, en í þá hluti sem það er þó gagnlegt, þá er Vigdís að gegna því betur þessa stundina en sá sem á að vera að gera það.

Það er gott að vita af henni þarna.

Vigdís talar til Breta 1. des.

Ég vil Þorvald Gylfason ekki lengur sem seðlabankastjóra.

Ég vil hann sem forsætisráðherra.

Hann kom alveg einstaklega vel fyrir á borgarafundinum í kvöld. Hann hefur bæði skilning á málefnunum, þá þekkingu sem er nauðsynleg, og þesslags hreinskilni og heiðarleika sem við getum treyst.

Þetta er ekki bara af því að hann kenndi mér í eina önn í fyrra. Þó reyndar hafi hann verið alveg frábær Þjóðhagfræðikennari þá líka.

Þetta var alveg frábær fundur. Bæði málefnalegur og kurteis. Og álit mitt á Össuri Skarphéðinssyni óx töluvert. 

Og þó ég hafi að vissu leiti samúð með stöðu ríkisstjórnarmanna, þá vaða þau í villu ef þau halda að þeir sem mættu á þennan fund hafi bara verið fulltrúar hins háværa minnihluta sem er hvorteðer alltaf óánægður. Ef þeir halda að þetta séu bara þeir sem eru hvorteðer alltaf á móti sjálfstæðisflokknum sem sjá sér nú lag.

Hver sem þekkir mig getur sagt ykkur að þegar ég er farinn að mæta á mótmæli, og farinn að krefjast nýrrar ríkisstjórnar og nýs seðlabankastjóra, þá er það skýrt dæmi um að það sé komið töluvert lengra en það.

Ég hef sagt áður að ég vilji ekki fara strax í kosningar...en ég myndi styðja stjórnarslit, ef einhver sem hægt er að treysta, eins og t.d. Þorvaldur Gylfason, myndi fá umboð til að mynda ópólitíska utanþingsstjórn til að stýra málum í eins og hálft ár, en þá yrði kosið.

„Þetta er þjóðin“

Hvernig í ósköpunum stendur á því

Að okkur dettur einu sinni í hug að treysta fjölmiðlum sem eru í eigu sömu mannanna og eiga mestu skuldirnar og bera mestu ábyrgðinna annars vegar, og eru reknir af ríkinu sem átti að hafa yfirsýn og halda aftur af þeim, en brást algjörlega, hins vegar?

Það er eins og ágætur maður sagði í ræðu á mótmælafundi um daginn, erfitt að taka afstöðu gegn einstaka aðillum, því þá lendir maður í liði með öðrum sem maður vill kannski líka taka afstöðu gegn.

Ég er hjartanlega sammála Davíð Oddssyni um margt í ræðu hans. Það hvernig bankakerfið var rekið var fáránlegt. Það er fáránlegt og út í hött hvað sumir af þessum hlutum gengu út fyrir allan þjófabálk.

En mér finnst samt að stjórn Seðlabankans þurfi að víkja, og Davíð með. Hávaxtastefnan var stór partur af vandamálinu. Hún gerði það of freistandi, og of gróðvænlegt, að taka gríðarstór lán.

Það var engu að síður bara röng og illa upplýst stefnuákvörðun. Ekki beinlínis glæpsamlegt athæfi, eða fáránlegur sofandaháttur.

Fjármálaeftirlitið gerði töluvert meiri skyssur, Ríkisstjórnin gerði töluvert meiri skyssur.

Við skulum ekki kaupa áróður stöðvar 2 sem vill telja okkur trú um að þetta sé allt bara Davíð að kenna, eða allt bara ríkisstjórninni að kenna.

Þeir bera vissulega ábyrgð. En þeir bara hana sannarlega ekki einir.

Ég verð ekki sáttur fyrr en við erum kominn með nýja Ríkisstjórn, helst með nýjum flokkum, eða flokkum sem hafa verið gjörsamlega endurmannaðir frá grunni. Fyrr en við erum kominn með nýtt Fjármálaeftirlit, nýjan Seðlabanka, og helst eitthvað endurskipulögð.

Ég verð ekki sáttur fyrr en við erum komin með óháða fjölmiðla. Eða að minnsta kosti einn óháðan fjölmiðil fjármagnaðan af ríkinu, án þess að lúta beinni stjórn ríkisins, sem þarf ekki að beygja sig undir vilja auglýsenda eða hugsa um nokkurn annan pól í umræðunni en Sannleikann. Tökum BBC sem fyrirmynd.

Fyrr en þessir menn sem fengu einhvern veginn ótakmörkuð lán, sem blésu út fyrirtæki á pappírum með kaupum og sölum fram og til baka, sem lögðu mannorð íslendinga í rúst með athæfi sínu, hafa verið rannsakaðir ofan í kjölinn og vonandi saksóttir.

Fréttaskýring: Vígreif varnarræða seðlabankastjóra

Hvað meinar hún?

Vill ekki útiloka?

 

Ef Rússar réðust inn í Nató-ríki væru þeir sjálfkrafa að lýsa öllu Nató stríði á hendur.

Þetta er ekki spurning um að útiloka eitt eða neitt, þetta er spurning um að heiðra sínar skuldbindingar.

Ef Georgía gengur í Nató, og svo er ráðist á það, þá ber hinum aðildarríkjunum að koma því til hjálpar. Alveg eins og ef ráðist væri inn í Ísland, Tyrkland eða Bretland. Hver væri tilgangurinn með að ganga í varnarbandalag ef hin bandalagsríkin væru búin að útiloka að heiðra það ef í harðbakkann slær?

Palin vill ekki útiloka stríð við Rússa